فوتو: news.arsu.kz
مەملەكەت باسشىسىنىڭ تاپسىرماسى بويىنشا بيىل مەملەكەتتىك ءبىلىم بەرۋ تاپسىرىسى 50 مىڭ ورىنعا ۇلعايتىلدى. تەحنيكالىق جانە كاسىپتىك كوللەدج ستۋدەنتتەرىنىڭ 75 مىڭى كۆوتا بويىنشا قابىلداندى.
ايتا كەتۋ كەرەك, مەملەكەتتىك تاپسىرىس تەحنيكالىق ماماندىقتارعا قايتا باعدارلاندى. ولاردىڭ قاتارىندا گەولوگيا, ەنەرگەتيكا, مەتاللۋرگيا, ماشينا جاساۋ, كولىك, IT, قۇرىلىس, پەداگوگيكا جانە مەديتسينا سياقتى سالالار بار.
كوللەدج ستۋدەنتتەرىن ىنتالاندىرۋ ماقساتىندا 2023 جىلدىڭ قىركۇيەگىنەن باستاپ ستيپەنديانى كەزەڭ-كەزەڭىمەن ارتتىرۋ قاراستىرىلعان: 2023 جىلدىڭ 1 قىركۇيەگىنەن باستاپ 50% وسەدى, 2024 جىلى 100%-عا دەيىن جەتكىزىلەدى. مەملەكەتتىك تاپسىرىس بويىنشا وقيتىن ستۋدەنتتەر الەۋمەتتىك قولداۋمەن, ونىڭ ىشىندە ستيپەنديامەن, تاماقتانۋمەن جانە جولاقىمەن قامتىلعان. سونداي-اق جاڭا وقۋ جىلىندا كوللەدج ستۋدەنتتەرى ءۇشىن 2,5 مىڭ ورىندىق 13 جاڭا جاتاقحانا اشىلادى.
